تامۆکسیفان

ئاماده‌کردنی د. شیروان نوری غه‌فور

 

تامۆکسیفان ده‌رمانێکه‌ دژی هۆرمۆنی ئۆیسترۆجین کارده‌کات . دۆزینه‌وه‌ی ئه‌م ده‌رمانه‌ ده‌گه‌ڕێته‌وه‌ بۆ 30 ساڵ له‌مه‌وپێش وه‌ به‌ شێوه‌یه‌کی زۆر به‌کار هاتوه‌ و به‌کاردێت بۆ چاره‌سه‌رکردنی نه‌خۆشی شێرپه‌نجه‌ی مه‌مک له‌ ئافره‌تدا وهه‌روه‌ها‌ هه‌ندێ جۆری شێرپه‌نجه‌ی پرۆستات .

خه‌لیه‌کانی ئه‌م شێرپه‌نجه‌یه‌ له‌کاتی گه‌شه‌کردنو بڵاوبونه‌وه‌یدا پێویستی به‌ هۆرمۆنی ئۆیسترۆجین هه‌یه . له‌ ده‌وروبه‌ری ئه‌م خه‌لیانه‌ جۆره‌ پرۆتینێک هه‌یه که‌ پێیده‌وترێت ڕیسێپته‌ر . ئه‌م ڕیسێپته‌ره‌ کاری یه‌کگرتن له‌گه‌ڵ ئۆیسترۆجین ئاسان ده‌کات و ئۆیسترۆجین ڕیسێپته‌ر له‌سه‌ر خه‌لیه‌کان دروست ده‌بێت . دروستبونی ئۆیسترۆجین ڕیسێپته‌ر ده‌بێته‌ هۆی ته‌شه‌نه‌کردنی خه‌لیه‌کانی ئه‌م شێرپه‌نجه‌یه‌ .

تامۆکسیفان رێگه‌ له‌ ئۆیسترۆجین ده‌گرێت ناهێلێت بگاته‌ سه‌ر خه‌لیه‌کانی شێرپه‌نجه‌که‌ - واته‌ تامۆکسیفان دروستبونی ئۆیسترۆجین ڕیسێپته‌ر ڕاده‌گرێت .

به‌شێوه‌یه‌کی گشی نه‌خۆش دوای نه‌شته‌رگه‌ری حه‌بی تامۆکسیفان وه‌رده‌گرێت . هه‌ندێ جاریش به‌ پێی گه‌وره‌بوونو بڵاوبوونه‌وه‌ی شێرپه‌نجه‌که پێش نه‌شته‌رگه‌ری ئه‌و حه‌به‌ ده‌درێت به‌ نه‌خۆشه‌که‌ به‌تایبه‌تی که‌ شێرپه‌نجه‌که‌ له‌سه‌ره‌تادا بێت .

شێرپه‌نجه‌ی مه‌مک جۆری زۆره‌ ، ئه‌گه‌ر جۆری ئه‌و شێرپه‌نجه‌یه‌ له‌سه‌ر هۆرمۆنی ئۆیسترۆجین بژی ئه‌وا وه‌رگرتنی تامۆکسیفان زۆر سوود به‌خش ده‌بێت بۆ ئه‌و نه‌خۆشه‌و نایه‌ڵێت خه‌لیه‌ی نوێ درووست بێت . پزیشکه‌کان بۆ ماوه‌ی پێنج ساڵ تامۆکسیفان ده‌ده‌ن به‌و نه‌خۆشه‌ چونکه‌ لێکۆڵینه‌وه‌کان وای ده‌رده‌خات که‌ وه‌رگرتنی تامۆکسیفان بۆ ماوه‌ی 3-5 ساڵ کاریگه‌ری خۆی به‌جێده‌هێنێت .

زۆر له‌ پزیشک و زاناکان وای به‌باش ده‌زانن که‌ تامۆکسیفان بده‌ن به‌و که‌سانه‌ی که‌ نه‌خۆش نین به‌ڵام پێشبینی تووشبونیان لێده‌کرێت وه‌ک ئه‌و ئافره‌تانه‌ی دایکیان یان خوشکیان نه‌خۆشن‌ به‌و شێرپه‌نجه‌یه‌ .

وه‌رگرتنی تامۆکسیفان هه‌ندێ زیانی لابه‌لای هه‌یه‌ وه‌ک گێژبوون ، ئاره‌قکردنه‌وه‌یه‌کی زۆر له‌کاتی خه‌وتندا ، له‌گه‌ڵ درووسبونی کلۆت له‌ خوێندا .    به‌ڵام سوودی ئه‌مه‌نده‌ زۆره‌ ئه‌و زیانه‌ لابه‌لایانه‌ بێ نرخ ده‌ژمێردرێت .‌‌‌